Badmintonárið 2010

Badmintonárið 2010

Við áramót er hefð að líta yfir árið sem er að líða og skoða helstu viðburði og afrek. Nóg hefur verið um að vera hjá badmintonfólki á árinu 2010 en stærsti viðburðurinn var án efa Iceland International sem var haldið í nóvember 2010. Eftirfarandi er stutt ágrip helstu viðburða Badmintonsambandsins á árinu 2010.

Janúar


Í janúar valdi stjórn Badmintonsambands Íslands Tinnu Helgadóttur og Helga Jóhannesson badmintonfólk ársins 2009. Þau Tinna og Helgi fengu viðurkenningu frá Íþrótta- og Ólympíusambandi Íslands ásamt íþróttafólki annarra íþróttagreina. Við sama tækifæri völdu Samtök Íþróttafréttamanna Íþróttamann ársins.

Tinna Helgadóttir, leikmaður danska úrvalsdeildarliðsins Greve, vann þrefaldan sigur á Meistaramóti TBR í janúar. Hún sigraði einliðaleik kvenna, tvíliðaleik kvenna ásamt Rakel Jóhannesdóttur og tvenndarleik ásamt bróður sínum, Magnúsi Inga Helgasyni. Heimsmeistari öldunga, Broddi Kristjánsson sigraði í tvíliðaleik karla ásamt Rasmus Mangor, kærasta Tinnu Helgadóttur. Einliðaleik karla vann Helgi Jóhannesson badmintonmaður ársins 2009.

Helgi Jóhannesson og Ragna Ingólfsdóttir kepptu á Alþjóðlega sænska mótinu, Swedish International 2010. Helgi keppti í einliðaleik karla í undankeppni mótsins en komst ekki inn í aðalmótið. Ragna keppti fyrst í undankeppni mótsins og síðan í aðalmótinu í einliðaleik kvenna. Helgi og Ragna kepptu einnig í tvenndarleik í undankeppni mótsins og í aðalmótinu.

Óskarsmót KR var haldið í janúar. Sigurvegari í einliðaleik karla var Helgi Jóhannesson TBR. Í einliðaleik kvenna vann Ragna Ingólfsdóttir TBR.

Í janúar var Barna- og unglingameistaramót TBR hluti af Reykjavík International Games, þriðja árið í röð.

Febrúar

Í febrúar var Deildakeppni BSÍ haldin. Keppt var í þremur deildum; Meistaradeild, A-deild og B-deild. Alls tóku 23 lið frá fjórum félögum auk eins gestaliðs frá Englandi þátt í Deildakeppninni í ár. Spilaðar voru 53 viðureignir milli liða í mótinu og samtals 386 leikir. Alls tóku tæplega 240 manns þátt í keppninni á öllum aldri. Liðið TBR Yfirvaldið varð Íslandsmeistari í Meistaradeildinni. TBR vann sér þar með þátttökurétt í Evrópukeppni félagsliða sem fer fram næsta sumar.

Evrópumót landsliða fór fram í Póllandi í febrúar. Fyrir Íslands hönd kepptu Helgi Jóhannesson, Atli Jóhannesson, Magnús Ingi Helgason og Kári Gunnarsson. Í kvennaliðinu voru Ragna Ingólfsdóttir, Tinna Helgadóttir, Snjólaug Jóhannsdóttir, Karitas Ósk Ólafsdóttir og Rakel Jóhannesdóttir. Þetta var fyrsta A-landsliðsferð Kára og Rakelar. Karlalandsliðið keppti fjóra leiki sem fóru þannig: Ísland 0 - Danmörk 5, Ísland 2 - Króatía 3, Ísland 1 - Finnland 4 og Ísland 4 - Ungverjaland 1. Kvennalandsliðið keppti 3 leiki sem fóru þannig: Ísland 0 - Þýskaland 5, Ísland 4 - Svíþjóð 1 og Ísland 2 - Spánn 3.

Reykjavíkurmót fullorðinna var haldið í lok febrúar. Í meistaraflokki í einliðaleik karla sigraði Atli Jóhannesson TBR. Í tvíliðaleik sigruðu Atli Jóhannesson TBR og Njörður Ludvigsson TBR. Í einliðaleik kvenna varð Rakel Jóhannesdóttir TBR í fyrsta sæti. Í tvíliðaleik kvenna sigruðu Rakel Jóhannesdóttir TBR og Elín Þóra Elíasdóttir TBR. Í tvenndarleik sigruðu Atli Jóhannesson TBR og Snjólaug Jóhannsdóttir TBR.

Mars

Í mars var Íslandsmót unglinga haldið í íþróttahúsinu við Vesturgötu á Akranesi. Mótið gekk mjög vel fyrir sig og var góð stemning á Skaganum alla helgina. Alls voru 227 leikmenn skráðir til leiks frá 13 félögum: Aftureldingu, BH, Hamri, Kelfavík, KR, ÍA, TBA, TBR, TBS, Samherja, UMFH, UMSB og UMS Þór. Sex leikmenn náðu þeim frábæra árangri að verða þrefaldir Íslandsmeistarar en það voru þau Davíð Bjarni Björnsson TBR, Alda Jónsdóttir TBR, Gunnar Bjarki Björnsson TBR, Margrét Jóhannsdóttir TBR, María Árnadóttir TBR og Kári Gunnarsson TBR. Lið BH var valið prúðasta lið mótsins. Umgjörð mótsins var öll hins prýðilegasta og eiga Skagamenn hrós skilið.

U19 landslið Íslands í badminton fór til Berlínar í Þýskalandi til að taka þátt í German Junior 2010. Keppendur fyrir Íslands hönd voru Egill G. Guðlaugsson, Haukur Stefánsson, Jónas Baldursson, Kári Gunnarsson, Elín Þóra Elíasdóttir, Jóhanna Jóhannsdóttir, Sunna Ösp Runólfsdóttir og Berta Sandholt. Íslensku keppendurnir tóku allir þátt í einliðaleik, tvíliðaleik og tvenndarleik.

Límtrésmót KR var haldið í Íþróttahúsi KR við Frostaskjól í mars. Keppt var í öllum flokkum nema tvíliðaleik kvenna í B-flokki. Vinningshafar voru eftirtaldir: Í meistaraflokki: Í einliðaleik karla sigraði Daníel Thomsen TBR. Í einliðaleik kvenna vann Ragna Ingólfsdóttir TBR. Í tvíliðaleik karla unnu Bjarki Stefánsson TBR og Daníel Thomsen TBR. Í tvíliðaleik kvenna sigruðu Ragna Ingólfsdóttir TBR og Katrín Atladóttir TBR. Í tvenndarleik unnu Daníel Thomsen TBR og Ragna Ingólfsdóttir TBR en þau unnu þrefalt á mótinu.

Fyrstu Ólympíuleikar ungmenna voru haldnir í Singapore í ágúst. Forkeppni Evrópu var haldin 19. - 21. mars í Svendborg í Danmörku. Árni Þór Hallgrímsson landsliðsþjálfari valdi Elínu Þóru Elíasdóttur og Nökkva Rúnarsson til að taka þátt fyrir Íslands hönd. Þátttakendur voru 37 talsins, 18 drengir og 19 stúlkur og keppt var í riðlum. Hvorki Elín Þóra né Nökkvi komust upp úr riðlum sínum.

Í lok mars fór fram einn stærsti viðburður vetrarins, Meistaramót Íslands, í TBR húsunum. Mótið gekk mjög vel. Keppt var í Meistaraflokki, A-flokki, B-flokki, Æðstaflokki og Heiðursflokki. Ragna Ingólfsdóttir, Helgi Jóhannesson og Magnús Ingi Helgason TBR verða að teljast sigurvegarar Meistaramótsins í ár. Þau sigruðu öll tvöfalt, Ragna í einliðaleik og tvíliðaleik ásamt Katrínu Atladóttur og Helgi í einliðaleik og tvíliðaleik ásamt Magnúsi Inga Helgasyni. Magnús sigraði einnig í tvenndarleik ásamt Tinnu systur sinni.

Apríl

Í apríl fékk Ragna Ingólfsdóttir styrk úr afrekskvennasjóði Íslandsbanka og ÍSÍ.

Evrópumótið í badminton var haldið í Manchester í Englandi. Ragna Ingólfsdóttir, Helgi Jóhannesson og Magnús Ingi Helgason höfðu þátttökurétt á mótinu og tóku þátt fyrir Íslands hönd. Ragna náði þeim merka áfanga að vera fyrst íslenskra kvenna til að komast í 16 kvenna úrslit í einliðaleik. Landsliðsfólkið varð síðan strandaglópar í Manchester vegna eldgossins í Eyjafjallajökli en heimferð þeirra seinkaði um þrjá daga vegna öskufalls.

Dregið var í happdrætti Badmintonsambandsins þann 21. apríl. Salan gekk mjög vel og fengu söluhæstu börnin í hverju félagi badmintonspaða sem viðurkenningu fyrir góða sölu. BSÍ þakkar öllu sölufólki sem og þeim sem keyptu miða fyrir stuðninginn.

Meistaramót BH fór fram í apríl. Þar stóðu uppi sem sigurvegarar í meistaraflokki Helgi Jóhannesson og Snjólaug Jóhannsdóttir í einliðaleik, Snjólaug Jóhannsdóttir og Þorbjörg Kristinsdóttir í tvíliðaleik kvenna, Helgi og Atli Jóhannessynir í tvíliðaleik karla og Snjólaug og Atli í tvenndarleik. Sjnólaug vann því þrefalt á mótinu.

Skrifað var undir styrktarsamning við Vörð sem er nýr aðalstyrktaraðili Badmintonsambands Íslands.

Ársþing Badmintonsambands Íslands var haldið 30. apríl og þann dag var einnig haldinn formannafundur aðildarfélaga BSÍ. Stjórn BSÍ er óbreytt næsta ár en hana skipa Sigríður Bjarnadóttir formaður, Broddi Kristjánsson varaformaður, Brynja Kolbrún Pétursdóttir gjaldkeri, Þorsteinn Páll Hængsson ritari, María Skaftadóttir meðstjórnandi, Guðlaugur Gunnarsson meðstjórnandi og Vigdís Ásgeirsdóttir meðstjórnandi.

Stigahæstu leikmennirnir á Stjörnumótaröð Badmintonsambandsins voru verðlaunaðir á þingi BSÍ. Í meistaraflokki sigruðu Ragna Ingólfsdóttir TBR og Atli Jóhannesson TBR en í öðru sæti voru Snjólaug Jóhannsdóttir TBR og Helgi Jóhannesson TBR. Margrét Jóhannsdóttir TBR og Jónas Baldursson TBR sigruðu í stigakeppni A-flokksins en í öðru sæti urðu María Árnadóttir TBR og Reynir Guðmundsson KR.

Maí

Endurnýjaður var ráðningarsamningur Árna Þórs Hallgrímssonar landsliðsþjálfara í byrjun maímánaðar til eins árs.

Ragna Ingólfsdóttir keppti á alþjóðlega spænska mótinu í maí.

Vormót trimmara var haldið í maí í TBR húsunum.

Júní

Badmintonfélag Hafnarfjarðar tók þátt í Evrópukeppni félagsliða eftir að TBR tók ákvörðun um að taka ekki þátt þetta árið. BH atti þar kappi við Evrópumeistara félagsliða frá árinu áður, rússneska liðið Favorit-Ramonskoe. Sú viðureign var, eins og við mátti búast, erfið og BH tapaði 0-7. Þá keppti lið BH við tékkneska liðið Sokol Vesely Brno Jehnice og töpuðu 1-6. Seinasti leikur BH var við ASKÖ Traun frá Austurríki. Honum lyktaði með sigri austurríska liðsins 5-2. Lið BH skipuðu Anna Lilja Sigurðardóttir, Brynja Kolbrún Pétursdóttir, Erla Björg Hafsteinsdóttir, Heiðar B. Sigurjónsson, Hólmsteinn Valdimarsson, Kjartan Ágúst Valsson og Tómas Björn Guðmundsson. Liðsstjóri var Hörður Þorsteinsson.

Júlí

Evrópuskólinn fór fram í Pressbaum í Austurríki þetta árið. Þátttakendur fyrir Íslands hönd voru Elisabeth Christensen TBR, Hulda Lilja Hannesdóttir TBR, María Árnadóttir TBR, Kristinn Ingi Guðjónsson BH, Ólafur Örn Guðmundsson BH og Thomas Þór Thomsen TBR.
Námskeiðið var mjög gagnlegt og lærdómsríkt. Vignir Sigurðsson TBR var á þjálfaranámskeiði sem haldið var meðfram Sumarskólanum. Þátttakendur voru 50 talsins frá 15 löndum auk 24 þátttakenda á þjálfaranámskeiðinu frá 21 landi.

Ágúst

Árlegar æfingabúðir, Nordic Camp voru haldnar á Íslandi í ár. Þetta er samstarfsverkefni Badmintonsambanda á Norðurlöndum. Æfingabúðirnar voru á Akranesi dagana 7. - 11. ágúst. Íslensku þátttakendurnir voru Sigríður Árnadóttir TBR, Hulda Lilja Hannesdóttir TBR, Sara Högnadóttir TBR, Daníel Jóhannesson TBR, Stefán Ás Ingvarsson Aftureldingu og Halldór Axel Axelsson ÍA. Á þjálfaranámskeiði sem var haldið samhliða búðunum sátu fyrir Íslands hönd Helgi Magnússon ÍA og Róbert Henn TBR.

September

Ragna Ingólfsdóttir hóf keppnistímabil vetrarins á Bitburger Open 2010 í Þýskalandi. Hún stóð sig vel og vann leikina tvo í forkeppninni örugglega en tapaði gegn Jeanine Cicognini frá Sviss en hún var röðuð númer sjö inn í mótið.

Þá keppti Ragna einnig á belgíska opna mótinu í september. Þar komst hún í aðra umferð en tapaði fyrir sigurvegara mótsins, Juliane Schenk frá Þýskalandi.

Ragna hlaut styrk frá Ólympíusamhjálpinni vegna undirbúnings undir Ólympíuleikana í London 2012. Styrkurinn nemur 1.000 USD á mánuði fram að leikunum auk 5.000 USD vegna keppnisferða. Þetta er glæsilegur árangur hjá Rögnu en hún hlaut þennan styrk líka fyrir Ólympíuleikana 2008.

Reykjavíkurmóti unglinga var haldið í TBR húsunum í september. Tveir aðilar unnu það afrek að verða þrefaldir Reykjavíkurmeistarar, í einliðaleik, tvíliðaleik og í tvenndarleik, þau Sigríður Árnadóttir (U15) og Gunnar Bjarki Björnsson (U19). Sigríður var einnig þrefaldur Reykjavíkurmeistari í fyrra. Gunnar Bjarki spilar upp fyrir sig en hann er fæddur árið 1995 og tilheyrir því aldursflokknum U15. Þetta er gífurlegt afrek hjá Gunnari Bjarka og er honum hér með óskað til hamingju með þetta afrek. Fimm einstaklingar urðu tvölfaldir Reykjavíkurmeistarar. Þau eru Alda Jónsdóttir (U13) í einliðaleik og tvíliðaleik, Daníel Jóhannesson (U15) í einliðaleik og tvenndarleik, Margrét Finnbogadóttir (U17) í einliðaleik og tvíliðaleik, Þorkell Ingi Eiríksson (U17) í tvíliðaleik og tvenndarleik og Margrét Jóhannsdóttir (U19) í tvíliðaleik og tvenndarleik. Margrét spilar upp fyrir sig en eins og Gunnar Bjarki er hún fædd árið 1995 og tilheyrir því aldursflokknum U15. Aðrir Reykjavíkurmeistarar eru: Alexander Örn Kárason (U13) í einliðaleik, Andri Árnason og Ormar Þór Harrason (U13) í tvíliðaleik, Margrét Nilsdóttir (U13) í tvíliðaleik, Jóna Hjartardóttir (U15) í tvíliðaleik, Guðmundur Ágúst Thoroddsen (U15) og Stefán Ás Ingvarsson (U15) í tvíliðaleik, Steinn Þorkelsson (U17) í einliðaleik, Sædís Björk Jónsdóttir (U17) í tvíliðaleik, Sigurður Sverrir Gunnarsson (U17) í tvíliðaleik, Unnur Björk Elíasdóttir (U17) í tvenndarleik, Rakel Jóhannesdóttir (U19) í einliðaleik, Sara Högnadóttir (U19) í tvíliðaleik og Thomas Þór Thomsen (U19) í tvíliðaleik.

Október

Fyrsta stjörnumót BSÍ, Atlamót ÍA, var haldið í október eins og undanfarin ár. Kári Gunnarsson TBR stóð uppi sem sigurvegari í einliðaleik karla eftir að hafa lagt sigurvegara síðasta árs, Atla Jóhannesson TBR, að velli. Geysispennandi viðureign var í undanúrslitum þegar Kári atti kappi við Íslandsmeistarann Helga Jóhannesson TBR en Helgi vann Kára í úrslitum Íslandsmótsins naumlega. Leikur þeirra fór í oddalotu á þessu móti en Kári hafði að lokum betur. Úrslitaviðureign í einliðaleik kvenna var einnig mjög spennandi en endaði með sigri Rakelar Jóhannesdóttur TBR á Snjólaugu Jóhannsdóttur TBR eftir oddalotu. Í tvíliðaleik karla sigruðu Daníel Thomsen og Bjarki Stefánsson TBR þá Arthúr Geir Jósefsson og Einar Óskarsson TBR. Í tvíliðaleik kvenna unnu Karitas Ósk Ólafsdóttir og Snjólaug Jóhannsdóttir TBR Halldóru Elínu Jóhannsdóttur og Katrínu Atladóttur TBR eftir oddalotu. Þá lauk tvenndarleiknum einnig með oddalotu þegar Arthúr Geir Jósefsson og Halldóra Elín Jóhannsdóttir TBR lögðu Helga Jóhannesson og Margréti Jóhannsdóttur TBR að velli. Það má því segja að Atlamótið hafi verið gífurlega spennandi í meistaraflokki.

Norrænar æfingabúðir voru haldnar á Færeyjum í október. Þær stóðu yfir dagana 11. til 18. október og þátttakendur voru frá Færeyjum, Grænlandi og Íslandi og voru fyrir aldurshóp U13 til U17. Átta aðilar tóku þátt frá hverju landi. Árni Þór Hallgrímsson landsliðsþjálfari valdi íslenska hópinn. Í honum voru: Alda Jónsdóttir TBR, Steinar Bragi Gunnarsson ÍA, Margrét Jóhannsdóttir TBR, Sigríður Árnadóttir TBR, Jóna Kristín Hjartardóttir TBR, Daníel Jóhannesson TBR, Stefán Ás Ingvarsson Aftureldingu og Þorkell Ingi Eriksson TBR. Æfingar stóðu frá morgni til kvölds þessa daga. Síðustu tveir dagarnir voru helgaðir móti en þar tóku allir meðlimir æfingabúðanna þátt. Um leið og æfingabúðirnar stóðu yfir var þjálfaranámskeið á vegum Badminton Europe í gangi. Á það komu þjálfarar frá Færeyjum, Grænlandi og Íslandi. Þátttakendur frá Íslandi á þjálfaranámskeiðinu voru Írena Jónsdóttir ÍA og Sigrún María Valsdóttir BH. Yfirþjálfari á námskeiðinu var Bjarne Nielsen landsliðsþjálfari Grænlands og eigandi "Top Direct Danish Badminton Academy".

Badmintonsamband Íslands hélt þjálfaranámskeiðið Badmintonþjálfari 1A í október. Námskeiðið er hluti af grunnmenntun badmintonþjálfara. Kennsla fór fram í Íþróttamiðstöðinni í Laugardal og TBR húsunum við Gnoðavog en kennari var Anna Lilja Sigurðardóttir, íþróttafræðingur og badmintonþjálfari. Á þessu fyrsta námskeiði badmintonþjálfaramenntunar var farið í gegnum marga leiki og spilaform sem þjálfarar geta nýtt sér við kennslu barna og unglinga. Einnig var farið í gegnum skipulag badmintonhreyfingarinnar, skipulag þjálfunar o.fl. Þátttakendur unnu ýmis verkefni saman í hópum og skapaðist mikil og góð umræða um hin ýmsu málefni sem tengjast badmintonþjálfun. Átta þjálfarar frá fjórum félögum tóku þátt og luku námskeiðinu. Þau eru: Ívar Oddsson TBR, Karen Guðnadóttir Keflavík, Kristinn Ingi Guðjónsson BH, Margrét Kjartansdóttir Keflavík, Ólafur Örn Guðmundsson BH, Sigrún María Valsdóttir BH, Sonja Magnúsdóttir TBA og Stefán Már Jónasson Keflavík.

Ragna Ingólfsdóttir og Helgi Jóhannesson kepptu á Kýpur International mótinu í október. Ragna náði þeim glæsilega árangri að lenda í þriðja til fjórða sæti á mótinu. Þá tóku þau einnig þátt í hollenska opna mótinu í október. Þar náði Ragna þeim árangri að komast í átta manna úrslit og hljóta fyrir það 2.750 stig á heimslistanum.

Tvíliða- og tvenndarleikshluti Óskarsmóts KR var haldinn í október. Í fyrsta sæti í tvíliðaleik karla í meistaraflokki höfnuðu Atli Jóhannesson TBR og Kári Gunnarsson TBR. Í tvíliðaleik kvenna í meistaraflokki enduðu Halldóra Elín Jóhannsdóttir TBR og Katrín Atladóttir TBR í fyrsta sæti. Í tvenndarleik í meistaraflokki unnu Arthúr Geir Jósefsson TBR og Halldóra Elín Jóhannsdóttir TBR.

TBR Opið var haldið í október. Margir keppendur sem spiluðu á mótinu tóku einnig þátt í Iceland International í nóvember. Í meistaraflokki sigraði í einliðaleik karla Atli Jóhannesson eins og árið 2009. Í tvíliðaleik karla sigruðu Atli Jóhannesson og Kári Gunnarsson. Í einliðaleik kvenna vann Katrún Atladóttir. Í tvíliðaleik kvenna báru Karitas Ósk Ólafsdóttir og Snjólaug Jóhannsdóttir sigur úr bítum. Í meistaraflokki í tvenndarleik unnu Elín Þóra Elíasdóttir og Helgi Jóhannesdóttir.

Sigríður Guðbjörg Bjarnadóttir formaður BSÍ fór á samráðsfund Norðurlandanna í Danmörku.

Nóvember

Í nóvember var Iceland International haldið í TBR húsunum. Mótið er hluti af Evrópumótaröðinni og gefur stig á heimslista Alþjóða Badmintonsambandsins en var lækkað í styrkleika frá árinu áður í Future Series mót. Alls tóku 83 keppendur frá sex þjóðum þátt í mótinu, 20 erlendir og 63 íslenskir. Umgjörð mótsins var öll hin glæsilegasta. Mótinu lauk með tvöföldum sigri Rögnu Ingólfsdóttur. Í einliðaleik sigraði hún Anitu Raj Kaur frá Malasíu 21-17 og 21-18. Í tvíliðaleik sigruðu hún og Katrín Atladóttir þær Erlu Björgu Hafsteinsdóttur og Tinnu Helgadóttur 21-14 og 21-13. Aðrir sigurvegarar voru Kim Bruun frá Danmörku í einliðaleik karla, Fredrik Colberg og Mette Poulsen frá Danmörku sigurðu tvenndarleikinn og tvíliðaleik karla unnu Emil Holst og Mikkel Mikkelsen, einnig frá Danmörku.

Ragna spilaði á tveimur mótum erlendis í nóvember, á franska Super series mótinu og alþjóðlega norska mótinu en þar spilaði hún auk Rakelar Jóhannesdóttur TBR, Snjólaugu Jóhannsdóttur TBR, Helga Jóhannessonar TBR, Atla Jóhannessonar TBR og Kára Gunnarssonar TBR.

Desember

Ragna Ingólfsdóttir spilaði á alþjóðlega írska mótinu og lenti þar í fimmta til áttunda sæti sem er mjög góður árangur. Á komandi ári mun Ragna halda ótrauð áfram að keppa erlendis með það að markmiði að komast á Ólympíuleikana í London árið 2012.

Dregið var í happdrætti Badmintonsambandsins þann 15. desember. Salan gekk mjög vel og fengu söluhæstu börnin í hverju félagi badmintonspaða sem viðurkenningu fyrir góða sölu. BSÍ þakkar öllu sölufólki sem og þeim sem keyptu miða fyrir stuðninginn.

Á haustönninni spiluðu tveir íslenskir badmintonspilarar í dönsku deildinni. Tinna Helgadóttir spilaði með Værlöse 2 sem er nú í fjórða sæti fyrstu deildarinnar og Magnús Ingi Helgason spilar með Hilleröd sem spilar í 3. deild er nú einnig í fjórða sæti deildarinnar.


Auk ofangreindra viðburða á árinu 2010 fóru fram tugir badmintonmóta á vegum aðildarfélaga BSÍ.

Landsliðshópar Badmintonsambandsins æfðu einnig öturlega á árinu bæði á stökum æfingum og í æfingabúðum yfir helgar.

Framundan er nýtt ár með nýjum og krefjandi verkefnum fyrir badmintonfólk um allt land. Ljóst er að árið mun einkennast af aðhaldi í rekstri eins og undanfarin ár en reynt verður eftir fremsta megni að halda hefðbundnum viðburðum sambandsins í föstum skorðum.

Fyrsta verkefni landsliðanna á nýju ári er Evrópumót landsliða sem fer fram í Hollandi í febrúar.

Stjórn og starfsfólk Badmintonsambandsins sendir badmintonfólki og landsmönnum öllum bestu óskir um gleðilegt ár og þakkir fyrir samstarfið á árinu sem nú er senn á enda.

Skrifað 31. desember 2010

 

Skrifað 1. janúar, 2011
mg