Helgi og Magnús komnir til Írlands

Á morgun fimmtudaginn 4.desember hefst keppni á alþjóðlega badmintonmótinu Yonex Irish International sem fram fer í Dublin um helgina. Íslandsmeistararnir Helgi Jóhannesson og Magnús Ingi Helgason eru á meðal keppenda á mótinu.

Undankeppni mótsins verður leikin á morgun en þar tekur Helgi þátt í einliðaleik. Magnús Ingi átti einnig að taka þátt í undankeppninni í einliðaleik en vegna forfalla hefur hann fengið sæti í aðal keppni mótsins. Í fyrsta leik mætir Helgi Íranum Kevin Kerrigan. Ekki liggja fyrir miklar upplýsingar um Kerrigan þar sem hann hefur ekki tekið þátt í mörgum alþjóðlegum mótum undanfarin misseri. Helgi rennir því nokkuð blint í sjóinn í fyrstu umferð. Til að komast inní aðal mótið þarf helgi að sigra þrjá andstæðinga eins og hann gerði um síðustu helgi í Cardiff.

Á föstudag hefst aðalkeppni mótsins og þá hefur Magnús Ingi keppni í einliðaleik og þeir Helgi og Magnús leika í tvíliðaleik. Takist Helga að sigra þrjá andstæðinga í undankeppninni verður hann einnig á meðal keppenda í einliðaleik á föstudeginum. Fyrsti andstæðingur Magnúsar í einliðaleiknum verður leikmaður sem kemst áfram úr undankeppni mótsins en það skýrist ekki fyrr en annað kvöld hver það verður. Í tvíliðaleik karla mæta þeir Magnús Ingi og Helgi Matevz Bajuk og Ales Murn frá Slóvakíu. Bajuk og Murn eru ungt par sem hefur ekki náð eins góðum árangri og Magnús Ingi og Helgi undanfarin misseri og því íslensku strákarnir fyrirfram taldir sigurstranglegri.

Smellið hér til að fylgjast með gangi mála á Yonex Irish International 2008.

Magnús Ingi Helgason og Helgi Jóhannesson

Skrifađ 3. desember, 2008
ALS