Landsli­i­ heldur til Hollands um helgina

Íslenska karla og kvenna landsliðið í badminton halda til Hollands um helgina. Í borginni Almere munu liðin taka þátt í Evrópukeppni landsliða karla annarsvegar og landsliða kvenna hinsvegar.

Mótið hefst á þriðjudag, 12.febrúar, en úrslitaleikirnir fara fram sunnudaginn 17.febrúar. Alls munu 57 lið berjast um Evrópumeistaratitlana tvo eða 30 karla lið og 27 kvenna lið. Efstu þrjú liðin í keppninni tryggja sér þátttöku rétt á Heimsmeistaramót landsliða (Thomas og Uber Cup) sem fram fer í Indónesíu í maí 2008.

Íslenska kvennalandsliðið leikur í riðli með Þýskalandi, Wales og Ítalíu þar sem þýsku stúlkurnar eru með röðun og fyrirfram taldar sterkastar í riðlinum. Íslenska karlalandsliðið leikur í riðli með Rússlandi, Tyrklandi og Spáni þar sem Rússar eru með röðun og fyrirfram taldir sterkasta lið riðilsins. Keppni fer þannig fram að leiknir eru þrír einliðaleikir og tveir tvíliðaleikir í hverri keppni milli tveggja þjóða. Allir leika við alla í riðlinum en aðeins efsta lið hvers riðils kemst áfram í útsláttarkeppni um Evrópumeistaratitilinn sjálfan. Smellið hér til að skoða leiki íslenska karlalandsliðsins og smellið hér til að skoða leiki íslenska kvennalandsliðsins.

Möguleikar íslenska kvenna landsliðsins

Þjóðverjar eru klárlega lang besta liðið í riðlinum hjá íslensku stelpunum og munu án efa standa undir röðun sinni og sigra riðilinn. Þýska kvennaliðið varð í 3.sæti í síðustu keppni sem haldin var fyrir tveimur árum í Grikklandi. Þeirra sterkasta einliðaleiks kona Huaiwen Xu sem er af kínverskum ættum er númer 7 á heimslistanum um þessar mundir og sú næst sterkasta Juliane Schenk er númer 17 á listanum. Í tvíliðaleik kvenna standa Þjóðverjar ekki síður vel en þeir eiga tvö pör á topp fimmtíu í heiminum og fjögur á topp hundrað. Það er því ljóst að íslensku stelpurnar hafa allt að vinna gegn þessu eitur sterka liði Þjóðverja.

Leikmenn Wales hafa ekki verið mikið á faraldsfæti undanfarið ár og eru því ekki margir þeirra inná heimslistanum. Þeir sem eru á listanum hafa farið á mjög fá mót og því segir staða þeirra þar lítið um getu þeirra. Það sama má þó segja um íslensku leikmennina sem lítið hafa verið á faraldsfæti fyrir utan Rögnu Ingólfsdóttur. Áætla má því að leikurinn gegn Wales geti orðið mjög jafn og ómögulegt að spá fyrir um úrslit hans. Þess má þó geta að síðast þegar þessi kvennalandslið mættust þá sigraði Ísland 3-2. Sá leikur fór fram á Heimsmeistarakeppni landsliða árið 1988 og er það eina skiptið svo vitað sé að þessi tvö lið hafi mæst áður.

Ítalir eru badmintonþjóð á uppleið sem alltaf eru að koma fram með betri og betri leikmenn. Þeir eiga eina mjög sterka einliðaleiks konu um þessar mundir, Agnese Allegrini, sem er númer 43 á heimslistanum eða 10 sætum ofar en Íslandsmeistarinn Ragna Ingólfsdóttir. Þær Agnese og Ragna hafa aldrei mæst í alþjóðlegu móti svo vitað sé til en á pappírunum má þó áætla að sú ítalska sé sterkari. Við skulum þó spyrja að leiks lokum því keppniskonunni Rögnu hefur oftar en ekki tekist að vinna leikmenn sem eru ofar en hún á heimslistanum. Aðrir leikmenn Ítalíu eru óskrifað blað og erfitt að meta getu þeirra. Leikurinn gegn Ítölum verður án efa spennandi og hugsanlegt að leikur Rögnu og Agnese muni ráða úrslitum hans á endanum. Miðað við gang sögunnar verður íslenska liðið í heild sinni þó að teljast sigurstranglegra því íslenska landsliðið hefur aldrei tapað fyrir Ítölum en liðin hafa mæst sjö sinnum í landsleik.

Miðað við fyrrgreindar upplýsingar um andstæðinga íslenska kvennalandsliðsins á Evrópumótinu í febrúar er harla ólíklegt að liðið sigri riðil sinn og í raun mjög óheppilegt að lenda með sterkasta liði mótsins í riðli. Líkur á öðru eða þriðja sæti í riðlinum eru hinsvegar nokkuð góðar en alls ekki öruggar.

Í kvennaliðið voru valdar þær Katrín Atladóttir, Ragna Ingólfsdóttir, Sara Jónsdóttir og Tinna Helgadóttir. Allt eru þetta reynslumiklar landsliðskonur sem hafa verið í íslenska landsliðinu undanfarin ár. Katrín hefur alls leikið 16 landsleiki fyrir Íslands hönd, Ragna 36, Sara 34 og Tinna 15. Sara hefur tekið sér frí frá landsliðsverkefnum undanfarin misseri en er nú komin að fullum krafti inn aftur sem er mjög ánægjulegt enda um sterka badmintonkonu hér að ræða.

 

Evrópukeppni landsliða - Undankeppni Thomas og Uber Cup. Magnús Ingi Helgason, Tinna Helgadóttir, Atli Jóhannesson, Ragna Ingólfsdóttir, Helgi Jóhannesson, Katrín Atladóttir, Árni Þór Hallgrímsson landsliðsþjálfari og Sara Jónsdóttir. Á myndina vantar Tryggva Nielsen sem einnig var í liðinu.

 

Möguleikar íslenska karlalandsliðsins

Rússneska liðið sem er með röðun í riðli íslenska karlalandsliðsins á Evrópumótinu komst ekki áfram úr riðlakeppni síðasta móts sem fram fór í Grikklandi fyrir tveimur árum. Það voru Pólverjar sem sáu til þess að þeir færu ekki áfram. Röðunina í ár fá þeir hinsvegar vegna góðrar stöðu leikmanna sinna á heimslistanum um þessar mundir. Stig þriggja bestu einliðaleiksmanna og tveggja bestu tvíliðaleiks liða hvers lands eru lögð saman og átta efstu þjóðirnar fá röðun. Sterkasti einliðaleiksmaður Rússa, Stanislav Pukhov, er númer 51 á heimslistanum. Þrír aðrir leikmenn þeirra eru á topp 200 á heimslistanum. Rússar eiga mjög sterka tvíliðaleiks menn. Þeirra sterkasta par er númer 21 á heimslistanum og það næst sterkasta númer 91. Miðað við stöðu leikmanna á heimslistanum má búast við því fyrirfram að Rússar sigri riðilinn en þeir þurfa án efa að strögla eitthvað og þá sérstaklega í öðrum og þriðja einliðaleik sem ekki er afgerandi sterkur hjá þeim.

Karlalið Tyrklands er líkt og íslenska liðið nokkuð óskrifað blað en leikmenn beggja liða hafa lítið tekið þátt í alþjóðlegum mótum undanfarin misseri og eru því mjög neðarlega á heimslistanum. Ísland og Tyrkland hafa aldrei mæst í landsleik og því heldur ekki hægt að spá fyrir um úrslit í leik liðanna út frá sögulegu sjónarhorni. Það eina sem í raun og veru vitað er um Tyrkina er að þeir hafa verið að koma upp með mjög góð unglingalið undanfarin ár og að þeir stóðu sig sérstaklega vel á U17 Evrópumótinu árið 2005. Það verður spennandi að sjá hvernig fer í fyrsta landsleik Tyrklands og Íslands í næstu viku.

Spánverjar eiga mjög sterka einliðaleiks stráka en þeirra sterkasti maður, Pablo Abian, er númer 44 á heimslistanum. Þeir eiga tvo aðra leikmenn á topp 100, einn númer 73 og annan númer 91. Miðað við stöðu á heimslista verður því að teljast ólíklegt að íslenska karla landsliðinu takist að sigra í einliðaleikjunum gegn þeim. Tvíliðaleikurinn gæti hinsvegar verið opnari en þar hafa Spánverjarnir lítið verið að taka þátt í alþjóðlegum mótum líkt og Íslendingarnir. Þar sem að leiknir eru þrír einliðaleikir en aðeins tveir tvíliðaleikir verða Spánverjar að teljast sigurstranglegri í landsleiknum á pappírunum. Ísland og Spánn hafa tvisvar áður mæst í keppni karla landsliða en í bæði skiptin hafði íslenska liðið sigur, 5-0 árið 1994 og 3-2 árið 2000. Sagan er því góð fyrir okkar menn.

Miðað við ofangreindar upplýsingar um andstæðinga íslenska karlalandsliðsins á Evrópumótinu í febrúar eru allar líkur á því að liðið muni bítast um 3.sæti riðilsins við Tyrki. Staðan á pappírunum gengur hinsvegar ekki alltaf eftir og því verður spennandi að fylgjast með keppninni.

Í karlaliðið voru valdir þeir Atli Jóhannesson, Helgi Jóhannesson, Magnús Ingi Helgason og Tryggvi Nielsen. Atli er nú í þriðja sinn valinn í íslenska A-landsliðið í badminton en hann var einnig í liðinu þegar það sigraði á Evrópukeppni B-þjóða í Laugardalshöll í janúar 2007 og á Heimsmeistarakeppni landsliða síðastliðið sumar. Hann hefur því aðeins leikið tvo landsleiki fyrir Íslands hönd. Aðrir leikmenn karla liðsins eru töluvert reynslumeiri og hafa verið í landsliðinu um nokkurra ára skeið. Helgi hefur leikið 33 landsleiki fyrir Íslands hönd, Magnús Ingi 17 og Tryggvi 35.

Nánari upplýsingar um Evrópukeppni landsliða má finná heimsíðu Badmintonsambands Evrópu eða heimasíðu mótsins http://ecteams2008.nl.

Skrifa­ 8. febr˙ar, 2008
ALS