Badmintonsamband Íslands hlýtur styrk úr Afrekssjóði ÍSÍ.
Meðfylgjandi texti er frá frétt ÍSÍ um styrkveitinguna.
"Afrekssjóður ÍSÍ tók upp nýtt fyrirkomulag á árinu og hafa fjölmörg sérsambönd hlotið styrki úr sjóðnum. Á undanförnum vikum hefur verið gengið frá formlegum samningum við þessi sérsambönd og nýverið var gengið frá samningi Badmintonsambands Íslands og Afrekssjóðs ÍSÍ vegna styrkveitinga ársins.
Badmintonsamband Íslands (BSÍ) flokkast sem B/Alþjóðlegt sérsamband samkvæmt flokkun Afrekssjóðs ÍSÍ fyrir árið 2018. Heildarstyrkveiting sjóðsins til BSÍ vegna verkefna ársins er 9.950.000 kr. en er það mikil hækkun á styrkupphæð frá síðustu árum þar sem verkefni BSÍ árið 2017 hlutu styrk að upphæð 3.800.000 kr. Töluverðar breytingar hafa orðið á afreksstarfi BSÍ síðustu ár en ný afreksstefna sambandsins var samþykkt 2016. Öflugt starf hefur verið í gangi í kringum afrekshópa sambandsins, aukin áhersla hefur verið lögð á þjálfaramál í kringum landsliðshópa og þá hefur sambandið sent keppendur á fjölmörg alþjóðleg mót. Sambandið vinnur að því að koma keppanda á næstu Ólympíuleika og krefst það töluverðar þátttöku á alþjóðlegum mótum".
Það voru þau Kristján Daníelsson, formaður BSÍ og Lilja Sigurðardóttir, formaður stjórnar Afrekssjóðs ÍSÍ sem undirrituðu samninginn ásamt þeim Kjartani Valssyni, framkvæmdastjóra BSÍ og Andra Stefánssyni, sviðsstjóra Afreks- og Ólympíusviðs ÍSÍ.