Danir burstuðu Íslendinga

Fyrstu leikir á Evrópumóti karlaliða og kvennaliða voru spilaðir í morgun.

Fyrsti leikur íslenska karlalandsliðsins var gegn geysilega sterku liði Dana. Danir unnu leikina 5-0.

Helgi Jóhannesson spilaði einliðaleik við Jan Ö Jörgensen og tapaði leiknum 21-13 og 21-17. Magnús Ingi Helgason spilaði næsta einliðaleik gegn Joachim Persson og tapaði 21-8 og 21-9. Atli Jóhannesson spilaði síðasta einliðaleikinn á móti Hans-Kristian Vittinghus. Vittinghus burstaði leikinn 21-9 og 21-5.

Þá voru leiknir tveir tvíliðaleikir karla. Helgi og Magnús Ingi spiluðu gegn Jonas Rasmussen og Simon Mollyhus og töpuðu 21-14 og 21-18. Seinasta leikinn spiluðu Atli og Kári Gunnarsson við Kasper Henriksen og Anders Kristiansen. Báðar loturnar enduðu 21-10 fyrir Danina.

Danska liðið er sigurstranglegast á mótinu og sitjandi Evrópumeistarar frá því fyrir tveimur árum. Það má búast við að þetta hafi verið erfiðasti leikur íslenska karlalandsliðsins í mótinu.

Næsti leikur karlalandsliðsins er við Króata klukkan 18 í dag.

Þá spilar íslenska kvennalandsliðið sinn fyrsta leik á mótinu í dag klukkan 14 gegn Þýskalandi.

Smellið hér til að sjá fleiri úrslit á Evrópumótinu.

Skrifað 16. febrúar, 2010
mg