Meistaramót Íslands framundan

Meistaramót Íslands í badminton fer fram í Íþróttahúsinu við Strandgötu í Hafnarfirði um næstu helgi. Búið er að draga í mótið og birta niðurröðun og tímasetningar. Smellið hér til að skoða nánar.

Keppni hefst föstudaginn 27.mars kl.17.00 og er áætlað að hún standi yfir til kl.22.30. Keppt verður í fjölmennustu flokkum mótsins á föstudeginum og mun keppni hefjast á tvenndarleik í A-flokki.

Laugardaginn 28.mars hefst keppni kl.9.00 og verður byrjað á tvenndarleik í meistaraflokki. Spilað verður fram í úrslit í öllum flokkum þennan dag en undanúrslit í meistaraflokki verða spiluð á tveimur völlum í lok dags eða kl.19.30-22.00.

Sunnudaginn 29.mars verður leikið til úrslita á Meistaramóti Íslands. Um morguninn fer fram keppni í A, B og öldungaflokkum og hefst keppni kl.9.00. Áætlað er að verðlaunaafhending í áður nefndum flokkum verði milli kl.11.30 og 12.00. Úrslit í meistaraflokki hefjast síðan kl. 13.50 og verða í beinni útsendingu hjá Sjónvarpinu. Áætlað er að mótinu ljúki um kl. 16.30.

Athugið að tímasetningar einstakra leikja eru til viðmiðunar. Leikmenn geta átt von á því að vera kallaðir upp 15 mínútum fyrir auglýstan leiktíma og þurfa því að vera tilbúnir til keppni tímanlega. Dagskrá mótsins er mjög þétt vegna töluverðrar fjölgunnar leikja milli ára og því verður aðeins mögulegt að hita upp í tvær mínútur inni á völlunum.

Yfirdómari Meistaramóts Íslands 2009 er Jan Samuelsson frá Svíþjóð. Mótsstjóri er Hörður Þorsteinsson, formaður Badmintonfélags Hafnarfjarðar.

Skrifað 24. mars, 2009
BH