Deildakeppni BS═ - ni­urr÷­un

Deildakeppni BSÍ fer fram dagana 30.janúar til 1.febrúar næstkomandi. Mótið er Íslandsmót liða í badminton þar sem keppt er í þremur deildum: meistaradeild, A-deild og B-deild. Búið er að draga í mótið og má nálgast niðurröðun með því að smella hér.

Alls hefur 21 lið skráð sig til keppni í Deildakeppnina 2009 frá fjórum félögum ásamt einu ensku gestaliði sem leikur í A-deild. Í fyrra tóku 24 lið þátt og árið þar á undan 19 þannig að keppnin heldur sig á svipuðu róli frá ári til árs.

Fyrirkomulagið í meistaradeildinni er þannig að fjögur lið keppa í riðli, allir við alla. Efstu tvö liðin leika síðan úrslitaleik um fyrsta sætið og neðstu tvö liðin úrslitaleik um þriðja sætið. Sigurliðið er Íslandsmeistari og keppir fyrir hönd Íslands í Evrópukeppni félagsliða.

Í A-deildinni eru skráð til keppni þrettán lið sem dregin hafa verið í fjóra þriggja til fjögurra liða riðla. Efstu tvö liðin í hverjum riðli fara í átta liða útsláttarkeppni þar sem keppt er um öll sæti. Neðstu tvö liðin í hverjum riðli fara einnig í útsláttarkeppni þar sem leikið er um 9.-13.sætið.

Alls eru 4 lið skráð til keppni í B-deildinni. Keppnisfyrirkomulag er það sama og í meistaradeildinni þ.e. að liðin fjögur keppa í riðli, allir við alla. Efstu tvö liðin leika síðan úrslitaleik um fyrsta sætið og neðstu tvö liðin úrslitaleik um þriðja sætið.

Þar sem að mestur fjöldi liða og flestar umferðir eru í A-deildinni hefst keppni hennar á föstudeginum kl. 19.00. Fyrirliðar þurfa að skila inn liðsuppstillingum ekki síðar en kl. 18.30. Aðrar deildir hefja keppni á laugardeginum og er almenn regla sú að liðsuppstillingum þarf að skila í það minnsta 30 mínútum áður en umferð hefst.

Lið Deildakeppninnar 2009 þurfa sjálf að sjá um að telja eða útvega teljara á sína leiki. Yfirdómari mótsins er Helgi Jónsson en aðrir í mótsstjórn eru stjórn og starfsmenn Badmintonsambands Íslands.
Athugið að niðurrröðun er birt með fyrirvara um villur. Mótsstjórn áskilur sér rétt til að gera lagfæringar ef þurfa þykir.

Smellið hér til að skoða nánari upplýsingar um Deildakeppni BSÍ. Bæði er hægt að skoða leikjaniðurröðun á netinu með því að smella hér en einnig á pdf skjölunum "lið og leikfyrirkomulag" og "leikjaplan".

TBR Öllarar. Þorsteinn Páll Hængsson, Vigdís Ásgeirsdóttir, Kristín Magnúsdóttir, Sara Jónsdóttir, Broddi Kristjánsson, Sigurður Hjaltalín, Elsa Nielsen, Njörður Ludvigsson, Indriði Björnsson og Ingólfur Ingólfsson.

Íslandsmeistarar í meistaradeild 2008 - TBR Öllarar

Skrifa­ 26. jan˙ar, 2009
ALS