EM landsli­i­ vali­

Evrópumót landsliða í badminton fer fram í borginni Liverpool á Englandi 10.-15.febrúar næstkomandi. Landsliðsþjálfari Íslands, Árni Þór Hallgrímsson, tilkynnti um helgina hvaða leikmenn munu taka þátt í mótinu fyrir Íslands hönd. Strákarnir sem valdir voru eru þeir Magnús Ingi Helgason, Helgi Jóhannesson og Atli Jóhannesson. Atli á að baki níu landsleiki, Magnús Ingi 28 og Helgi 45. Stelpurnar í íslenska liðinu eru þær Tinna Helgadóttir, Snjólaug Jóhannsdóttir og Karitas Ósk Ólafsdóttir. Tinna er reynslumest stúlknanna og hefur spilað 27 landsleiki fyrir Íslands hönd en Snjólaug hefur aðeins leikið þrjá og Karitas engann. Allir leikmennirnir í íslenska liðinu koma úr TBR nema Karitas sem æfir og keppir með Badmintonfélagi Akraness.

Þjóðunum 32 sem þátt taka í mótinu hefur verið skipt niður í átta fjögurra liða riðla. Ísland lendir í 7. riðli með Ítalíu, Ungverjalandi og Úkraínu sem fyrirfram er talin sterkasta þjóðin í riðlinum. Segja má að röðunin sé nokkuð góð fyrir Ísland því Úkraína er talið veikast af þjóðunum átta sem raðað er í mótið. Á síðasta Evrópumóti lenti Ísland í 13.sæti og hélt sér uppi á meðal A-þjóða Evrópu. Í ár leika A og B þjóðirnar hinsvegar saman og komast aðeins sigurvegararnir í hverjum riðli áfram í útsláttarkeppni um Evrópumeistaratitilinn.

Miðað við stöðu mála á pappírunum verður að teljast ólíklegt að íslenska landsliðinu takist að komast uppúr riðlakeppni mótsins. Úkraína og Ísland hafa tvisvar mæst í badmintonlandsleik þar sem Ísland beið lægri hlut 0-5 í bæði skiptin. Leikmenn Úkraínu eru almennt ofar á heimslistum heldur en þeir íslensku og því taldir líklegri sigurvegarar. Hinsvegar er góðir möguleikar á því að íslenska liðinu takist að vera í öðru sæti í riðlinum því íslenskt landslið hefur aldrei tapað fyrir Ítalíu í landsleik og oftar unnið Ungverja heldur en tapað fyrir þeim.

Smellið hér til að skoða niðurröðun Evrópumótsins í badminton og hér til að skoða heimasíðu mótsins.

Skrifa­ 22. desember, 2008
ALS