Magnús og Helgi úr í einliðaleik

Landsliðsmennirnir Magnús Ingi Helgason og Helgi Jóhannesson eru nú staddir í Cardiff í Wales þar sem þeir taka þátt í alþjóðlega badmintonmótinu Yonex Welsh International. Í hádeginu í dag kepptu þeir í einliðaleik á mótinu og töpuðu báðir sínum leik í fyrstu umferð keppninnar.

Magnús mætti Hollendingnum Rune Massing og tapaði 21-13 og 21-9. Helgi spilaði þriðja þriggja lotu leik sinn á mótinu í röð þegar hann tapaði fyrir Frakkanum Brice Leverdez. Frakkinn er fyrirfram talinn líklegastur til sigurs á mótinu og því óheppni hjá Helga að mæta honum í fyrsta leik. Fyrstu lotu vann Helgi naumlega 22-20 en næstu tvær tók Leverdez 21-10 og 21-13. Helgi tók þátt í undankeppni mótsins í gær og vann þá þrjá andstæðinga með glæsibrag.

Síðar í dag taka þeir Helgi og Magnús Ingi þátt í tvíliðaleik. Andstæðingar þeirra í fyrstu umferð eru heimamennirnir Joe Morgan og James Phillips. Síðast þegar Helgi og Magnús mættu Walesverjunum sigruðu þeir í jöfnum leik. Það verður spennandi að sjá hvernig viðureign þeirra endar í dag.

Smellið hér til að fylgjast með gangi mála á Yonex Welsh International.

Magnús Ingi Helgason og Helgi Jóhannesson

Skrifað 28. nóvember, 2008
ALS