Úrslit Unglingamóts Aftureldingar

Unglingamót Aftureldingar var haldið um helgina. Keppt var í öllum greinum í aldursflokkum U13 til U19 nema í kvennagreinum í U19. Mótið var hluti af Dominos unglingamótaröð Badmintonsambands Íslands og gaf stig á styrkleikalista unglinga. Sigurvegarar á mótinu voru eftirtaldir:

Í flokki U13 sigraði Davíð Örn Harðarson ÍA í úrslitum Andra Broddason TBR 21-19 og 21-19 í einliðaleik hnokka. Björk Orradóttir TBR vann Katrínu Evu Einarsdóttur ÍA í úrslitum 21-13 og 21-8 í einliðaleik táta. Í tvíliðaleik hnokka unnu Andri Snær Axelsson og Davíð Örn Harðarson ÍA Brynjar Má Ellertsson ÍA og Magnús Daða Eyjólfsson KR í úrslitum 22-20 og 21-12. Í tvíliðaleik táta unnu Eva Margit Atladóttir og Lív Karlsdóttir TBR í úrslitum Önnu Alexöndru Petersen og Söru Júlíusdóttur TBR eftir oddalotu 12-21, 21-19 og 21-14. Í tvenndarleik unnu Davíð Örn Harðarson ÍA og Ingibjörg Rósa Jónsdóttir UMFS en þau sigruðu í úrslitum Brynjar Má Ellertsson og Katrínu Evu Einarsdóttur ÍA eftir oddalotu 12-21, 21-12 og 21-14.

Í flokki U15 vann Andri Snær Axelsson ÍA í úrslitum Símon Orra Jóhansson ÍA 21-12 og 21-10 í einliðaleik sveina. Andrea Nilsdóttir TBR vann í úrslitum Þórunni Eylands TBR 21-18 og 21-19 í einliðaleik meyja. Í tvíliðaleik sveina unnu Eysteinn Högnason og Kjartan Örn Bogason TBR en þeir unnu í úrslitum Atla Geir Alfreðsson og Einar Sverrisson TBR eftir oddalotu 15-21, 21-18 og 21-19. Í tvíliðaleik meyja unnu Andrea Nilsdóttir og Erna Katrín Pétursdóttir TBR í úrslitum Hörpu Kristnýju Sturlaugsdóttur ÍA og Þórunni Eylands TBR 21-17 og 21-18. Í tvenndarleik unnu Eysteinn Högnason og Þórunn Eylands TBR. Þau unnu í úrslitum Daníel Ísak Steinarsson BH og Andreu Nilsdóttur TBR eftir oddalotu 21-19, 18-21 og 21-12.

Í flokki U17 vann Davíð Phuong TBR en hann vann í úrslitum Steinar Braga Gunnarsson ÍA 21-18 og 22-20 í einliðaleik drengja. Harpa Hilmisdóttir UMFS vann í úrslitum Örnu Karen Jóhannsdóttur TBR 21-15 og 21-10 í einliðaleik telpna. Í tvíliðaleik drengja unnu Kolbeinn Brynjarsson og Pálmi Guðfinnsson TBR Davíð Phuong og Vigni Haraldsson TBR í úrslitum eftir oddalotu 17-21, 21-14 og 22-20. Í tvíliðaleik telpna unnu Arna Karen Jóhannsdóttir TBR og Margrét Dís Stefánsdóttir Aftureldingu Hörpu Hilmisdóttur UMFS og Línu Dóru Hannesdóttur TBR eftir oddalotu 21-16, 18-21 og 21-15. Í tvenndarleik unnu Kristófer Darri Finnsson og Margrét Nilsdóttir TBR en þau unnu í úrslitum Pálma Guðfinnsson og Línu Dóru Hannesdóttur TBR 21-7 og 21-19.

Í flokki U19 vann Daníel Jóhannesson TBR Kristófer Darra Finnsson í úrslitum eftir oddalotu 21-16, 18-21 og 21-18 í einliðaleik pilta. Í tvíliðaleik pilta unnu Daníel Jóhannesson og Sigurður Sverrir Gunnarsson TBR í úrslitum Davíð Bjarna Björnsson og Kristófer Darra Finnsson TBR eftir oddalotu 21-17, 17-21 og 21-18. Ekki var keppt í einliða eða tvíliaðelik kvenna né tvenndarleik í flokki U19.

Smellið hér til að sjá fleiri úrslit á Unglingamóti Aftureldingar.

Skrifað 25. nóvember, 2013
mg