Íslandsmót unglinga hefst á morgun

Íslandsmót unglinga verður á Akranesi um helgina. Badmintonfélag Akraness heldur mótið þetta árið í samstarfi við Badmintonsamband Íslands.

Mótið hefst á morgun, föstudaginn 15. mars klukkan 10 með leikjum í fyrstu umferð í tvíliða- og tvenndarleik í flokkum U13, hnokka og táta, og U15, sveina og meyja. Flokkar U17 og U19 hefja leik á laugardaginn klukkan 11. Áætluð mótslok eru sunnudaginn 17. mars klukkan 15.

Keppendur eru 208 talsins frá 12 félögum, Aftureldingu, BH, Hamri, ÍA, KR, Samherja, TBKA, TBR, TBS, UDN Búðardal, UMF Skallagrími og UMF Þór. Spilaðir verða 415 leikir um helgina.

Mótsstjóri er Róbert Henn og mótsstjórn skipa Irena Rut Jónsdóttir, Karitas Eva Jónsdóttir, Margrét Gunnarsdóttir og Ragnar Harðarson.

Á laugardeginum hefst keppni klukkan 9 í flokki U11 snáða og snóta. Sá flokkur er spilaður allur og klárast keppni í U11 með verðlaunaafhendingu klukkan 11. Þá hefst keppni í einliðaleik U17, drengja og telpna og U19, pilta og stúlnka, og áætluð lok dagsins er klukkan 18.

Á sunnudeginum hefst keppni með undanúrslitaleikjum klukkan 10 og úrslitaleikir hefjast klukkan 11:40. Áætluð mótslok eru klukkan 15.

Smellið hér til að sjá niðurröðun og tímasetningar mótsins.

Athugið að tímasetningar geta breyst og mótið verður keyrt áfram eins og hægt er.

Prúðasta liðið fær bikar í lok mótsins.

Skrifað 14. mars, 2013
mg