Ragna og Kári eru badmintonfólk ársins 2012

Stjórn Badmintonsambands Íslands hefur valið Rögnu Ingólfsdóttur og Kára Gunnarsson badmintonfólk ársins 2012. Ragna og Kári fá viðurkenningu frá Íþrótta- og Ólympíusambandi Íslands laugardaginn 29. desember ásamt íþróttafólki annarra íþróttagreina. Við sama tækifæri munu Samtök Íþróttafréttamanna krýna Íþróttamann ársins.

Meistaramót Íslands - Snjólaug Jóhannsdóttir og Ragna IngólfsdóttirMeistaramót Íslands - Kári Gunnarsson

Ragna var fulltrúi Íslands á Ólympíuleikunum í London í sumar auk þess að verða Íslandsmeistari í einliðaleik í níundasta skipti en enginn annar badmintonspilari hefur hampað Íslandsmeistaratitli í einliðaleik svo oft. Að auki stóð hún sig mjög vel í alþjóðlegum keppnum. Kári Gunnarsson er Íslandsmeistari í einliðaleik og er lykilmaður í landsliðinu og hefur spilað á fyrsta velli einliðaleik fyrir Íslands hönd.

Eftirfarandi er stutt ágrip á helstu afrekum badmintonfólks ársins 2012.

Badmintonmaður ársins 2012 - Kári Gunnarsson f. 11. janúar 1991

Badmintonmaður ársins 2012 er Kári Gunnarsson úr Tennis- og badmintonfélagi Reykjavíkur og Københavns Badminton Klub.

Kári Gunnarsson er Íslandsmeistari í einliðaleik en Kári er búsettur í Danmörku og kom til landsins til að keppa á þessu eina móti á þessu ári.

 

Iceland International 2011

 

Kári er í A-landsliðinu í badminton. Hann keppti með landsliðinu fyrir Íslands hönd á Evrópumóti karlalandsliða í Svíþjóð í febrúar og á Evrópumóti einstaklinga í Englandi í apríl. Hann hefur verið í unglingalandsliðum Íslands á undanförnum árum og spilaði fyrst með A-landsliðinu árið 2010.

Kári stóð sig best allra íslensku keppendanna í einliðaleik karla á Iceland International mótinu í nóvember síðastliðnum en mótið gefur stig á heimslista og er innan mótaraðar Badminton Europe. Þar komst hann í átta manna úrslit og vann meðal annars Jong Woo Yim frá Suður Kóreu sem flýgur hratt upp heimslistann þrátt fyrir að vera nýfarinn að taka þátt í alþjóðlegum mótum.

Badmintonkona ársins 2012 - Ragna Ingólfsdóttir f. 22. febrúar 1983

Badmintonkona ársins 2012 er Ragna Ingólfsdóttir úr Tennis- og badmintonfélagi Reykjavíkur.

Ragna er langfremsta badmintonkona landsins. Hún varð Íslandsmeistari í badminton í mars síðastliðnum í einliðaleik og varð með því fyrsti íslenski badmintonspilarinn til að hampa Íslandsmeistaratitli í einliðaleik níu sinnum en auk þess hefur hún orðið tíu sinnum Íslandsmeistari í tvíliðaleik og einu sinni í tvenndarleik. Alls hefur hún unnið Íslandsmeistaratitil 20 sinnum. Þá vann hún öll þau mót sem hún tók þátt í hérlendis á árinu.

Ragna hefur verið í A-landsliði Íslands í badminton um árabil og keppti með landsliðinu fyrir Íslands hönd í Evrópukeppni kvennalandsliða í Svíþjóð í febrúar og í Evrópukeppni einstaklinga í Englandi í apríl.

Ragna tók þátt í einu til þremur alþjóðlegum mótum í mánuði undanfarin ár til að safna stigum á heimslistanum. Ragna hefur unnið til verðlauna á alþjóðlegum mótum en hún hefur meðal annars unnið Iceland International mótið fimm sinnum en mótið er innan mótaraðar Badminton Europe og gefur stig á heimslista.

Með góðri stöðu á heimslistanum vann hún sér inn þátttökurétt á Ólympíuleikunum í London í sumar í annað skipti en hún keppti einnig á Ólympíuleikunum í Kína árið 2008. Ragna var í kringum 70. sæti heimslistans allan fyrri hluta ársins og fram að Ólympíuleikum. Ragna komst hæst í 68. sæti heimslistans á árinu.

 

Ragna leikur gegn Stapusaityte frá Litháen

 

Ragna stóð sig frábærlega á Ólympíuleikunum í London í sumar. Keppt var í þriggja manna riðlum og Ragna mætti fyrst Akvile Stapusaityte frá Litháen. Ragna vann hana örugglega 21-10 og 21-16. Þá mætti hún Jie Yao frá Hollandi sem var raðað númer 14 inn á leikana en hún er upphaflega kínversk og er fjórða besta badmintonkona heims skv. heimslistanum. Ragna tapaði eftir hörkuspennandi aðra lotu sem endaði með naumum sigri Yao 21-12 og 25-23. Með sigri á Stapusaityte varð Ragna fyrsta íslenska konan til að vinna badmintonleik á Ólympíuleikum.

Eftir Ólympíuleikana í London lagði Ragna Ingólfsdóttir spaðann á hilluna eftir stórglæsilegan feril.

Skrifađ 12. desember, 2012
mg