Ólympíudraumurinn orđinn ađ veruleika

Það er heimslisti Alþjóða Badmintonsambandsins í dag, fimmtudaginn 3. maí 2012, sem sker úr um það hvaða badmintonleikmenn munu öðlast keppnisrétt á Ólympíuleikunum í sumar. Afrekskonan Ragna Ingólfsdóttir er númer 72 á listanum í einliðaleik kvenna og hefur með þeim árangri tryggt sér þátttökurétt í þessari miklu og vinsælu íþróttahátíð. Innan Evrópu er Ragna í 27. sæti í einliðaleik. Badmintonsambandið er einstaklega stolt af þessum frábæra árangri Rögnu sem er glæsilegur fulltrúi badmintoníþróttarinnar á Íslandi.

 

Iceland International 2011

 

Íslenskt badmintonfólk á Ólympíuleikum

Fyrst var keppt í badminton á Ólympíuleikum árið 1992 í Barcelona en þá unnu þrír Íslendingar sér rétt til þátttöku; Árni Þór Hallgrímsson, Broddi Kristjánsson og Elsa Nielsen. Í Atlanta árið 1996 var Elsa Nielsen eini íslenski þátttakandinn í badminton á leikunum. Árið 2000 og árið 2004 náðu engir íslenskir badmintonmenn að tryggja sér þátttökurétt á Ólympíuleikum. Árið 2008 tók Ragna Ingólfsdóttir þátt og þetta eru því aðrir Ólympíuleikarnir sem hún keppir á.

 

Árni Þór Hallgrímsson, Elsa Nielsen og Broddi Kristjánsson

 

Annað skipti á Ólympíuleika

Ragna hafði átt sér þann draum að öðlast keppnisrétt á Ólympíuleikum í mörg ár. Hún keppti á leikunum í Peking í Kína árið 2008 og þær Sara Jónsdóttir voru mjög nálægt því að vinna sér þátttökurétt í tvíliðaleik á Ólympíuleikunum í Aþenu árið 2004. Ragna slasaðist í leik á leikunum í Peking en náði sér að fullu og hefur keppt á alþjóðlegum mótum úti um allan heim síðustu tvö ár.

Mikil ferðalög

Árangur badmintonfólks í alþjóðlegum mótum frá 2. maí 2011 til 29. apríl 2012 er það sem liggur bakvið heimslistastöðu leikmanna í dag, 3.maí. Yfirleitt er talað um að þetta tímabil sé hið svokallaða Ólympíuár. Á þessu árs tímabili hefur Ragna Ingólfsdóttir tekið þátt í 17 alþjóðlegum mótum í jafnmörgum borgum. Löndin sem Ragna hefur keppt í badmintonmótum á undanförnu ári eru 14 talsins og í þremur heimsálfum. Alls hefur Ragna verið erlendis í 76 daga á undanförnu ári eða samtals í tvo og hálfan mánuð. Eftirfarandi er listi yfir þá staði sem Ragna hefur keppt á Ólympíuárinu.

DANMARK INTERNATIONAL - Maí 2011 Fredrikshavn Danmörku
SUDIRMAN CUP - Maí 2012 Qingdao Kína
LITHUANIAN OPEN - Júní 2012 Kauns Lítháen
RUSSIAN WHITE NIGHTS - Júlí 2012 Gatchina Rússlandi
GUATEMANA INTERNATIOANAL - September 2012 Guatemala borg í Guatemala
CZECH INTERNATIONAL - September 2012 Brno Tékklandi
DUTCH INTERNATIONAL - Október 2012 Almere Hollandi
BITBURGER OPEN - Nóvember 2011 Saarbruecken Þýskalandi
ICELAND INTERNATIONAL- Nóvember 2011 Reykjavík
NORWEGIAN INTERNATIONAL - Nóvember 2011 Oslo Noregi
SCOTTISH INTERNATIONAL - Nóvember 2011 Glasgow Skotlandi
WELSH INTERNATIONAL - Desember 2011 Cardiff Wales
SWEDISH INTERNATIONAL - Janúar 2012 Stokkhólmi Svíþjóð
EUROPEAN WONMENS TEAM CHAMPIONSHIPS - Febrúar 2012 Amsterdam Hollandi
AUSTRIAN INTERNATIONAL - Febrúar 2012 Vín Austurríki
GERMAN OPEN - Mars 2012 Mulheim an der Ruhr Þýskalandi
EUROPEAN CHAMPIONSHIPS - Apríl 2012 Karlskrona Svíþjóð

Árin áður en Ólympíuárið hófst voru ekki síður mikilvæg fyrir Rögnu. Með því að vera búin að vinna sig ofarlega á heimslistanum fyrir Ólympíuárið gerði Ragna sér kleift að sleppa að mestu við undankeppnir á tímabilinu og tryggja sér röðun í sumum mótum. Ragna hóf keppni eftir Ólympíuleikana í Peking haustið 2009 og frá þeim tíma, þegar undirbúningur fyrir Ólympíuleikana í London hófst til dagsins í dag hefur Ragna Ingólfsdóttir tekið þátt í 38 alþjóðlegum mótum sem fram hafa farið í 21 landi. Auk þessara landa hefur Ragna að sjálfsögðu þurft að millilenda í mörgum fleiri. Á meðfylgjandi heimskorti eru löndin sem Ragna hefur heimsótt.

 

Heimskort Rögnu

 

Árangurinn góður

Það getur verið erfitt að ná fram sínu besta þegar mótaálag er eins mikið og hjá Rögnu undanfarið ár. Rögnu hefur þó tekist að ná mjög góðum árangri á mörgum mótum á undanförnu ári. Hún sigraði Iceland International mótið í fimmta sinn á sex árum (en mótið var ekki haldið árið 2008) og lenti í öðru sæti í Alþjóðalega litháenska mótinu og Alþjóðlega velska mótinu. Þá náði hún einnig góðum árangri í Bitburger Open, Alþjóðlega tékkneska mótinu, Alþjóðlega austurríska mótinu, White Nights í Rússlandi, Evrópukeppni kvennalandsliða í Hollandi og Heimsmeistarakeppni landsliða í Kína sem skiluðu henni mikilvægum stigum á heimslistanum.

Stuðningur úr ýmsum áttum

Eins og gefur að skilja fylgir því mikill kostnaður að ferðast eins mikið og Ragna hefur þurft að gera á undanförnum árum. Stuðningur margra góðra aðila hefur því verið nauðsynlegur fyrir Rögnu. Tennis- og badmintonfélag Reykjavíkur, Yonex, Badmintonsamband Íslands, Afrekssjóður ÍSÍ, Ólympíusamhjálpin, Íþróttabandalag Reykjavíkur, ls retail, World Class, Vörður, Lifandi Markaður, Yggdrasill, Now, Saffran, Asics, Sportís, Afrekskvennasjóður Íslandsbanka og ÍSÍ, Örninn hjólaverslun, Ingólfur kírópraktor, Pétur sjúkraþjálfari, Trimmhópar í TBR og fleiri hafa stutt dyggilega við bakið á badmintonkonunni. En það er ekki aðeins fjárhagslegur stuðningur sem er mikilvægur fyrir íþróttafólk eins og Rögnu því það er umgjörðin öll sem þarf að smella saman. Margrét Gunnarsdóttir framkvæmdastjóri Badmintonsambandsins hefur séð um allt utanumhald ferða Rögnu. Slíkur undirbúningur er ótrúlega tímafrekur enda þarf að panta flug, gistingu, sjá til þess að hún sé sótt á flugvöllinn og margt fleira. Sviðsstjóri Afrekssviðs Íþrótta- og Ólympíusambandsins og fagteymi sjúkraþjálfara, lækna og sálfræðinga Íþróttasambandsins hafa einnig veitt ómetanlegan stuðning. Síðast en ekki síst er það þjálfari Rögnu, Jónas Huang, sem hefur fylgt henni um allan heim og hvatt hana áfram á badmintonvellinum.

Ragna Ingólfsdóttir

Ólympíuleikarnir

Badmintonkeppni Ólympíuleikanna fer fram 28 júlí til 5. Ágúst í Wembley Arena í London. Alls munu 172 leikmenn taka þátt í badmintonkeppninni. Ragna hefur unnið sér keppnisrétt í einliðaleik kvenna en einnig er keppt í einliðaleik karla, tvíliðaleik kvenna, tvíliðaleik karla og tvenndarleik. Aðeins 38 leikmenn fá þátttökurétt í einliðaleikjunum og 16 pör í tvíliða- og tvenndarleik.
Þann 10. maí næstkomandi sendir Alþjóða Badmintonsambandið boð um þátttöku til þeirra Ólympíusambanda sem eiga leikmenn sem hafa unnið sér keppnisrétt á leikunum. Badmintonsambandið mun óska eftir því að Íþrótta- og Ólympíusamband Íslands staðfesti þátttöku Rögnu á leikunum fyrir Íslands hönd. Framundan hjá Rögnu eru strangar æfingar og undirbúningur fyrir þátttökuna á Ólympíuleikunum í London í sumart. Ragna mun taka þátt í Evrópukeppni félagsliða í Ungverjalandi ásamt félagsliði sínu TBR í lok maí sem og æfingabúðum á vegum Evrópusambands Evrópu í sumar til undirbúnings fyrir leikana.

Skrifađ 3. maí, 2012
mg