Meistaramót Íslands er um helgina

Meistaramót Íslands í badminton fer fram í TBR húsunum við Gnoðarvog um helgina. Búið er að draga í mótið og birta niðurröðun og tímasetningar. Smellið hér til að skoða nánar.

Keppni hefst föstudaginn 8. apríl klukkan 18:00 og er áætlað að hún standi yfir til klukkan 22:00. Keppt verður í meistaraflokki, A- og B-flokki á föstudeginum og mun keppni hefjast á tvenndarleik í meistaraflokki.

Laugardaginn 9. apríl hefst keppni klukkan 9:00 og verður byrjað á tvenndarleikjum í öllum flokkum. Spilað verður fram í úrslit í öllum flokkum þennan dag en undanúrslit í meistaraflokki verða spiluð á tveimur völlum í lok dags eða klukkan 18:00 – 20:30.

Sunnudaginn 10. apríl verður leikið til úrslita á Meistaramóti Íslands. Um morguninn fer fram keppni í A-, B- og öldungaflokkum og hefst keppni klukkan 10:00.

Áætlað er að verðlaunaafhending í áður nefndum flokkum verði milli klukkan 12:30 og 13:00.

Úrslit í meistaraflokki hefjast síðan klukkan 13:50 og verða í beinni útsendingu hjá Sjónvarpinu.

Áætlað er að mótinu ljúki um klukkan 16:30.

Athugið að tímasetningar einstakra leikja eru til viðmiðunar. Leikmenn geta átt von á því að vera kallaðir upp 15 mínútum fyrir auglýstan leiktíma og þurfa því að vera tilbúnir til keppni tímanlega. Dagskrá mótsins er mjög þétt vegna fjölda leikja og því verður aðeins mögulegt að hita upp í tvær mínútur inni á völlunum.

Fjöldi keppenda á mótinu eru 154 frá 12 félögum, Aftureldingu, BH, Einherja, Huginn, ÍA, KR, TBA, TBR, TBS, UMF Skallagrími, UMFE og Víkingi.

Yfirdómari Meistaramóts Íslands 2011 er Hörður Þorsteinsson formaður Badmintonfélags Hafnarfjarðar. Mótsstjóri er Guðlaugur Gunnarsson stjórnarmaður í Badmintonsambandi Íslands.

Skrifað 5. apríl, 2011
mg