Deildakeppni BSÍ

01.02.2008 - 03.02.2008

Upplýsingasíða: http://www.badminton.is/?sid=26

Niðurröðun 2008: http://tournamentsoftware.com/sport/tournament.aspx?id=19057

Deildakeppni BSÍ fer fram í TBR húsunum dagana 1.-3.febrúar næstkomandi. Mótið er Íslandsmót liða í badminton þar sem keppt er í þremur deildum: meistaradeild, A-deild og B-deild. Búið er að draga í mótið og má nálgast niðurröðun með því að smella hér.

Skráning í Deildakeppnina 2008 er mjög góð og hafa alls 24 lið skráð sig til keppni en 19 lið voru með í fyrra. Vegna fjölgunar liða þarf að spila sextán fleiri leiki heldur en í síðustu keppni og því verður einnig spilað á föstudegi í ár.

Fyrirkomulagið í meistaradeildinni er þannig að fimm lið keppa í riðli, allir við alla. Sigurliðið er Íslandsmeistari og keppir fyrir hönd Íslands í Evrópukeppni félagsliða.

Í A-deildinni eru skráð til keppni átta lið sem dregin hafa verið í tvo fjögurra liða riðla. Efstu tvö liðin í hvorum riðli fara svo í úrslitariðil sem keppir um 1.-4.sætið í A-deildinni. Neðstu tvö liðin í hvorum riðli leika í úrslitariðli um 5.-8.sætið. Fyrirkomulagið í úrslitariðlunum í A-deildinni er þannig að þau lið sem áður hafa mæst í keppninni mætast ekki aftur heldur taka úrslitin frá því deginum áður með sér í riðilinn.

Alls eru 11 lið skráð til keppni í B-deildinni. Þeim hefur verið skipt í þrjá riðla, einn þriggja liða og tvo fjögurra liða. Efsta liðið í hverjum riðli keppir í úrslitariðli um 1.-3.sætið í B-deildinni. Þau lið sem verða númer 2 í sínum riðlum leika um 4.-6.sætið og þau sem verða númer 3 um 7.-9.sætið. Liðin sem lenda í fjórða sæti leika úrslitaleik um 10.sætið.

Þar sem að mestur fjöldi liða og flestar umferðir eru í B-deildinni hefst keppni hennar á föstudeginum kl. 19.00. Fyrirliðar þurfa að skila inn liðsuppstillingum ekki síðar en kl. 18.30. Aðrar deildir hefja keppni á laugardeginum og er almenn regla sú að liðsuppstillingum þarf að skila í það minnsta 30 mínútum áður en umferð hefst.

Lið Deildakeppninnar 2008 þurfa sjálf að sjá um að telja eða útvega teljara á sína leiki. Yfirdómari mótsins er Helgi Jónsson en aðrir í mótsstjórn eru stjórn og starfsmenn Badmintonsambands Íslands. 

Athugið að niðurrröðun er birt með fyrirvara um villur. Mótsstjórn áskilur sér rétt til að gera lagfæringar ef þurfa þykir.

Smellið hér til að skoða nánari upplýsingar um Deildakeppni BSÍ.